الثلاثاء، 29 ديسمبر 2009
سفينـه المؤزمـين، إلى أين مرسـاها !!
الجمعة، 4 ديسمبر 2009
المسلم والبراك والوعلان وبورميه بين الحق الدستوري وقله الادب
عيب اللي قاعدين تسونه ضيوف كرام وقاده الدول الخليجيه في ضيافه الكويت وانتو ماسحين كرامه الكويت في الارض استغليتوا قرب مؤتمر القمه وصرتوا تطعنون في رئيس الحكومه، و وزير الدفاع، و وزير الداخليه استنادا لحق دستوري... الدستور وثيقه اعتمدها الشعب الكويتي و عقد بينهم وبين الاسره، الغرض منها تنظيم امور البلد، وان كل طرف يعرف حدوده، الاستجواب حق دستوري وما نناقش فيه، ولكن استغلال الحق الدستوري، بضرب اعمده البلد واحنا على مشارف ضيافه مؤتمر القمه لمجلس التعاون، اعتقد قله ادب وعدم احساس بالمسؤليه.
ما كان يمنعكم شي من تاجيل الاستجواب لبعد مؤتمر القمه، وبعد ما يغادرون الضيوف والاشقاء الخليجين، ولكن لحاجه في نفس يعقوب قضاها، استغليتوا قدوم الضيوف وحاولتوا تشويه سمعه اعمده هذا البلد، نقول لكم تراها عيب وقله ادب..
والاعجب يا جماعه ان سمو رئيس الوزرا وافق على صعود المنصه نزولا للإراده الدستوريه الا ان صاحبنا كان مصر على ان يكون الاستجواب علني، امعانا منه وقصد للاساءه، وليس بيان للحقيقه، كل اللي يبيه يقدم شو بالتلفزيون يمكن يلحق اوبرا بالشهره،، اما الثاني اللي يبي يستجوب وزير الدفاع مو فاهمين شنو يبي ولا شنو يقصد، محاور الاستجواب قريناها، و كلها مواضيع قديمه مرت عليها حكومتين او ثلاث وصاحبنا كان موجود بالمجلس ، سبحان الله بس قرب مؤتمر القمه تذكرها كأن ارواح الناس اللي ماتت في ذيك السنه لعبه بيده ويستغل عاطفه القبائل والعوائل كورقه يلعب فيها وليس دفاعا عنهم، وين مقترحاتك لهم ولغيرهم من زملائهم في الجيش من الشهداء وغيرهم من المتضررين من هذي الحوادث من تقديم الدعم المادي والمعنوي ولا هو بس استغلال مؤتمر القمه...اما عاد استجواب وزير الداخليه فحدث ولا حرج، الظاهر الظرف اللي كان يشيله صاحبنا بيده دايما يوم الاستجواب الاول كان فاضي ومصادره ما يابت له المعلومات، بس الحقيقه ان المعلومات كانت عنده ، وارجعوا الي محاضر الاستجواب اللي فات، كان يدري عن هالنقطه واثارها في الاستجواب والحين يعيدها مره ثانيه عشان المؤتمر.. يعني السالفه كلها ان الاشاوس تجاوزوا الحق الدستوري.. والله عيب.. وما نبي نكثر حجي لان الفضايح راح تطلع واحنا في غنى عنها ...
يا جماعه عندنا ضيوف عيب عليكم ..